2025 წელს, DV2027 განახლებული წესებით დაიწყება. მწვანე ბარათის ლატარია ყოველწლიურად ათასობით ადამიანს აძლევს შანსს, ლეგალურად იცხოვროს და იმუშაოს ამერიკის შეერთებულ შტატებში. თუმცა, როგორც ნებისმიერი მასშტაბური პროგრამა, ის პერიოდულად განიცდის ცვლილებებს, რომლებიც მიზნად ისახავს პროცესის გამარტივებას, უსაფრთხოების გაზრდას და თაღლითობის რისკების შემცირებას.
ყოველწლიურად, აშშ-ის სახელმწიფო დეპარტამენტი შემთხვევითი შერჩევის პრინციპით გასცემს 55,000-მდე საემიგრაციო ვიზას იმ ქვეყნების მოქალაქეებზე, რომლებსაც აქვთ შეერთებულ შტატებში იმიგრაციის შედარებით დაბალი მაჩვენებელი.
1. რეგისტრაციის მოსაკრებელი
მწვანე ბარათის ლატარიის ისტორიაში პირველად, DV-2027 ციკლიდან დაწყებული, ძალაში შედის წესი, რომელიც გათამაშებაში მონაწილეებს ავალდებულებს გადაიხადონ მცირე, არაანაზღაურებადი ელექტრონული მოსაკრებელი - $1 (ერთი აშშ დოლარი), ონლაინ განაცხადის წარდგენის მომენტში.
რას ნიშნავს ეს ცვლილება?
მთავარმა აპლიკანტმა, რომელიც ავსებს მწვანე ბარათის აპლიკაციას, უნდა გადაიხადოს მოსაკრებელი, $1-ის სახით. გადახდა ხორციელდება ონლაინ, ოფიციალური პორტალის მეშვეობით, სადებეტო ან საკრედიტო ბარათით.
არსებული ცვლილების მიზანი აშშ-ის სახელმწიფო დეპარტამენტის განმარტებით ორ მთავარ მიზანს ემსახურება:
- ადმინისტრაციული ხარჯების გადანაწილება: პროგრამის მართვის ხარჯებს, რომელსაც ადრე მხოლოდ გამარჯვებული მონაწილეები იხდიდნენ სავიზო მოსაკრებლის სახით, ახლა ყველა მონაწილე მცირედით აანაზღაურებს.
- თაღლითობის შემცირება: მოსაკრებლის შემოღება შეამცირებს ყალბი განაცხადების რაოდენობას.
გასათვალისწინებელია ის ფაქტიც, რომ $1-იანი საფასური არაანაზღაურებადია და საფასური არ ბრუნდება იმ შემთხვევაშიც კი, თუ განმცხადებელი არ იქნება შერჩეული ან მოგვიანებით გადაწყვეტს უარი თქვას პროცესის გაგრძელებაზე.
2. პასპორტის მონაცემები
მიუხედავად იმისა, რომ ბოლო წლებში პასპორტის სავალდებულო მოთხოვნა გაუქმდა, DV2027-იდან რეგისტრაციის დროს პასპორტის მონაცემების ჩაწერა და ფოტოს ატვირთვა სავალდებულო გახდა. აღნიშნული ცვლილება მიზნად ისახავს პროგრამის მთლიანობის დაცვას და თაღლითური სქემების აღმოფხვრას.
ახლა უკვე საჭიროა ძირითადი აპლიკანტი ფლობდეს მოქმედ, ვალიდურ საერთაშორისო პასპორტს. რეგისტრაციის დროს შეიყვანოს პასპორტის მონაცემები, როგორიცაა პასპორტის ნომერი, პასპორტის გამცემი ქვეყანა და ა.შ.. ასევე, საჭირო ხდება პასპორტის ბიომეტრიული გვერდის სკანირებული ასლის ატვირთვა
როგორ მოვემზადოთ DV2027-ისთვის?
DV-2027 რეგისტრაციის პერიოდი ამ ეტაპზე ცნობილი არ არის. თუმცა, მაქსიმალური მზადყოფნისთვის მიჰყევით შემდეგ ნაბიჯებს:
- შეამოწმეთ უფლებამოსილება: დარწმუნდით, რომ ხართ იმ ქვეყნის მოქალაქე, რომელიც მონაწილეობს პროგრამაში და აკმაყოფილებთ განათლების ან სამუშაო გამოცდილების მოთხოვნებს.
- მოამზადეთ პასპორტი
- გადაიღეთ ახალი ფოტოები: გადაიღეთ ახალი ფოტო, წესების სრული დაცვით.